|

Shir Gaalkacyo uga socday Puntland iyo Galmudug oo lasoo gabagabeeyay laganasoo saaray warsaxaafadeed.

Gaalkacyo: Shir socday muddo shan maalin ah oo u dhaxeeyay maamullada Puntland iyo Galmudug ayaa la soo gabagabeeyay,inta uu shirka socday waxaa looga hadlay sidii loo xasilin lahaa xaaladaha colaadeed ee ka jira deegaannada dhul daaqsimeedka baadiyaha iyo waliba in xal loo helo dhibaatooyinkii ka dhashay dagaalladii horey uga dhacay magaalada Gaalkacyo.

Shirka waxaa ka qaybgalay muddada uu socday mas’uuliyiita laba maamul iyo odayaasha dhaqanka,waxaana laga soo saarey 10 qodob.

Hoos ka akhri qodobbada ka soo baxay shirka oo lugu baahiyay bogga wakaaladda wararka Puntland.

1- In laga hortago wixii keeni kara colaad iyo dagaal, lana joojiyo wixii dhaq dhaqaaq ciidan ah,lana hubiyo ciidamada labada dhan ay kala joogaan xeryahooda,si waafaqsan heshiisyadii xabad joojinta ee horey loo gaaray,lana kormeero goobaha colaaddu ka jirto.

2- Waxaa lugu baaqay,laguna heshiiyay in lays la qaato nabad, lana gaarsiiyo guud ahaan dadka reer Puntland iyo Galmudug.

3- Waxaa laysku afgartay in muddo 90 cisho gudahood ah lugu qabto shirweyne dib u heshiisiineed oo lugu xalinayo dhamaan khilaafaadka gobolka Mudug, labada maamulna ay dhisaan guddi farsamo.

4- In labada maamul ay si dhameystiran uhirgaliyaan heshiiskii la saxiixay 22 June 2017 iyo kuwii ka horreeyayba.
5- In la furo waddooyinka xiran, lana kormeero hirgalinta heshiisyadii xabad joojinta.

6- In la sii wado shirarka dib u heshiisiinta, lagana xisaabtamo wixii dhacdooyin laga soo billaabo dhacdadii Balibusle, maamuladuna ay ka taageeraan fududeynta xal u helista dhacdooyinkaas.

7- In culuma’udiinka, ganacsatada iyo jaaliyadaha gobolku ay si firfircoon uga qayb qaataan ka shaqeynta sidii lagu gaari lahaa nabad baahsan oo ka dhalata gobolka Mudug.

8- Waxaa laysku raacay, lana dhisay guddi nabadda ka shaqeeya oo ka kooban 36 xubnood labada dhanba.

9- In Guddiga nabadda labada dhan ay ka soo shaqeeyaan xeer lugu xakameeynayo dhacdooyinka fal dambiyeedyada.

10- In fidno wade loo aqoonsado, meelna looga soo wada jeesto ciddii ka hortimaadda hirgalinta nabadda iyo dib u heshiisiinta dadka walaalaha ah ee Galmudug iyo Puntland.

Puntlandi.com

You must be logged in to post a comment Login