|

Xildhibaan Yuusuf Xasan oo mar kale difaacday Kursiga Kamakunji.

Xildhibaan Yuusuf Xasan ayaa mar kale difaacday Kursiga Xildhibaano ee degmada Kamakunji, kaddib markii uu codod badan uga adkaaday Musharaxii la tartamayay.

Tartanka Kursiga Kamakunji ee Xaafada Islii ayaa ahaa mid si aad ah isha loogu hayay, waxaana ku loolamayay Xildhibaanka difaacanayay kursigiisa Yuusuf Xasan iyo Ibraahim Joonii.

Yuusuf Xasan ayaa ku guuleystay codod dhan 38,282, halka Musharaxa kale ee la tartamayay Ibraahim Joonii uu helay codod dhan 19,000.

Xildhibaan Yuusuf Xasan ayaa lagu wadaa in la guddoonsiiyo shahaadada kursiga uu ku guuleystay, waxaana uu hataan ku sugan yahay xarunta Bomas ee ka socota tirinta cododka doorashada.

Xaafada Islii oo ay degto Soomaalida ugu badan, ganacsi kala duwan ku leh ayaa waxaa la sheegay in looga dabaal degay Guusha Xildhibaan Yuusuf Xasan.

Tirinta cododka ayaa wali iska soo daba dhacaya, waxaana soo baxaya xubno hor leh oo ku guuleysanaya kuraasta ay ku tartameen ee deegaanada ay ka soo jeedaan.

Aadan Barre Ducaale ayaa xalay la shaaciyay inuu ku guuleystay kursiga deegaan Baarlamaaneedka Gaarisa Township, isagoo ka adkaaday Siyaasiga caanka ah Faarax Macalin.

Illaa iyo hada laguma dhawaaqin natiijada doorashada Madaxweynaha, waxaana ku horeeya natiijada horudhaca ah Madaxweynaha talada haya Uhuru Kenyatta, halka Raila Odinga uu ku xigo, inkastoo uu qaadacay natiijada horudhaca ee cododka la tiriyay.

Puntlandi.com

 

You must be logged in to post a comment Login